Wi snackt platt

In düsse Utgaav vun "Wi snackt Platt" wüllt wi an Peter NIssen torüchdenken. An'n Oostermaandag is de plattdüütsche Översetter, Autor, Journalist un Dramaturg veel to fröh in’t Öller vun 68 Johr an en korte swore Krankheit storven. He weer en ganz wunnerbaren Mann, de in sien veel to kortet Leven ganz, ganz veel doon hett för uns Plattdüütsche Spraak: He hett för den NDR un dat Ohnsorg-Theater arbeidt, hett Böker un Theaterstücken in't Plattdüütsche bröcht - un vele vun Jo besinnt sik seker ok noch op de Asterix-Comics un de twee Harry-Potter-Böker, de he tohoop mit sien Kompagnon Hartmut-Cyriacks op Platt översett hett. Ok de Plattdüütschen Narichten vun NDR 90,3 hett he vör mehr as 30 Johrn mit in't Leven ropen. Wi wüllt bi "Wi snackt Platt" nochmal an em denken un ut sien Leven vertellen. Denn schall dat ok noch üm den Hamborger Plattdüütsch Dag an’n tokamen Sünnavend, den 18. April, gahn. Wi vertellt Jo en beten wat mehr över de Highlights, de dat an düssen Dag to beleven gifft. Un wi sünd bi de Hennebergbühn in Poppenbüddel to Besöök: An’n Freedagavend fiert dor de Kummedi “En snaakschet Poor” vun Neil Simon Premieer.

Mehr över Plattdüütsch bi'n NDR finnt Ji ünner ndr.de/platt!

Bi "Wi snackt Platt" geiht dat dütmal üm Hamborger Volksdanz un Drachten: de "Finkwarder Danzkring" fiert düssen April sien 50johrig Bestahn - un dat mit en groten Jubiläums-Optritt an'n 25. April, namiddags üm halvig veer, in'e Stadtdeelschool Finkwarder in'n Norderschulweg 14. Wi hebbt de Lüüd vun’n Danzkring mal bi een vun jümehr Proven besöcht. Denn dreiht sik dat dütmal ok noch üm Lüüd, de fröher mal in'n Hamborger Haven arbeidt hebbt: de Ketelklopper! An'n Hamborger Plattdüütsch Dag an'n 18. April gifft dat in't Düütsche Havenmuseum en Veranstalten, wo ganz veel wat över de Ketelklopper un jümehr egen "Ketelklopper-Spraak" vertellt warrt. Wi hebbt al vöraf mal mit den Ehrenamtlichen Uwe Doleschel snackt, de över dat Thema bannig goot Bescheed weet. Un denn, kloor, gifft dat bi uns ok noch den "Oosterspazeergang" ut Goethe sien Faust to hören - op Platt, versteiht sik. Frohe Oostern mit NDR 90,3!

Dütmal fiert wi mit Jo Geboortsdag: 70 Johr oolt warrt uns plattdüütsche Radioreeg “Hör mal’n beten to” un wi vertellt jo en beten wat mehr doröver, woans dat domals allens so losgahn is. Denn weern wi verleden Maandag in’t Ohnsorg-Theater mit dorbi: dor sünd Lüüd ehrt un uttekent worrn, de sik op ganz besünner Oort un Wies üm dat Theater verdeent maakt hebbt: Peter Nissen, Dr. h.c. Eggert Voscherau, Gerd Spiekermann und Dr. Christian Breitzke. Bavento sünd wi ok noch bi dat Theater 99 in’e Veerlannen to Besöök - dor warrt vunaf den 10. April de Kummedie "Kurschadden op Afweeg" speelt. Un wi vertellt Jo mehr över uns NDR 90,3-Optaktgala to’n 5. Hamborger Plattdüütsch Dag. An'n Freedag, den 17. April, is de to beleven. Avends Klock 19.30 geiht de los - un wenn Ji dorbi ween wüllt, denn köönt Ji dorför Korten winnen.

De Leder in uns Sennen:

Let`s wörk togesser - Torfrock
Dat wer Mai - Ina Müller
Sett de Seils -Knipp Gumbo
Deep in DIen Hart - Janina
Wiet wech - Gerrit Hoss

De Fritz-Reuter-Pries vun'e Carl-Toepfer-Stiften in Hamborg, de is sowat as de Nobel-Pries för Plattdüütsch. All twee Johr warrt de Pries utlöövt, un dütmal geiht he an den Hamborger Autor, Översetter, Dramaturg un Regisseur Frank Grupe. Wi stellt Jo den Priesdräger vun den mit 10.000 Euro doteerten Pries vör. Denn wi sünd ok noch bi dat Theater 47 in Jenfeld to Besöök: dor gifft dat vunaf den 10. April den Ohnsorg-Klassiker "Keen Utkamen mit't Inkamen" to beleven. Dorto maakt wi ok noch en lütten Utfloog hen na't Soltmuseum in Lümborg - un bavento vertellt Jo noch de Vörsitter vun'n Plattdüütsch Root för Hamborg Peer-Marten Scheller, wat dat allens bi'n Hamborger Plattdüütsch Dag an'n Sünnavend, den 18. April, to beleven gifft. Dat ganze Programm köönt Ji Jo nu ok online ankieken - un twors op de Internetsiet vun'n Plattdüütsch Root för Hamborg.

Bi "Wi snackt Platt" geiht dat dütmal üm de ne'e Utstellen "Wat heet hier Minnerheit?", de dat vunaf den 11. März in’t Altnaer Museum to beleven gifft. Denn vertellt wi Jo ok noch mehr över de Premieer vun dat Stück "Jungs vun de Waterkant - Die Gebrüder Wolf" in't Ohnsorg-Theater, dat geiht üm dat Plattdüütssch Hörspeel "Dat Füerschipp" vun Siegfried Lenz – un wi sünd ok noch bi Tanks Theater in Noordersteed to Besöök: dor steiht an'n Dunnersdag, den 12. März, de Premieer vun dat Stück "Champagner to'n Fröhstück" an.