牛哥講經丨廣東話哲學、書籍分享

本集對應第31次得閒讀書會：https://youtube.com/live/oGLcwKmOZRM

「一直以來，男性都誤將女人視為競爭對手，事實上，父權體制才是男性受苦的根源。」

父權體制嘅影響有時明顯，有時隱晦，透過各種方式影響緊所有人。雖然女性主義嘅崛起對父權體制帶嚟衝擊，但男性對女性主義嘅排斥同抗拒從來都冇減少過，甚至仲有越演越烈嘅趨勢。
「我寫這本書的初衷，就是希望男性也能加入改變父權體制的行列。許多男性在父權體制下並不快樂，但他們很難理解為什麼這套以男人為中心的體制會帶給他們這麼大的痛苦。」

關注性別議題嘅美國社會學博士Allan G. Johnson，寫咗一本《性別打結: 拆除父權違建》，作者總結到：「在父權體制下，身為男人並不是被壓迫的群體，相反地，男人是父權體制之中的主導性別，這樣的位置讓他們得到某些好處，但也必須付出一定的代價，這就是他們受苦的原因。」

依家，我哋了解一下咩叫男性係父權社會嘅主導性別。

曾經，良知呢一個概念，係陽明哲學嘅「把柄」、亦係喚醒孟子學嘅救命稻草。學者指出，佢好可能經由傳教士嘅翻譯，輾轉傳到去現代西方哲學之父——笛卡兒嘅頭腦當中。而良知學事實上東渡日本，將日本從德川幕府嘅極端封建制度中拯救出嚟，引領住明治維新嘅志士推動改革。
可惜嘅係，呢股充滿力量嘅思潮，喺現代經已褪色，由百死千難所證嘅信念，變成大眾陌生嘅概念。為此，我將會同學識合作舉辦第二個課程，叫做「良知、啟蒙與維新：王陽明哲學與失序時代」，希望藉由【陽明學源起】以及【陽明學影響】兩大部分，從學術脈絡、人物傳記、中西比較及東亞傳播四個維度，協助大家立體咁重構王陽明嘅精神世界。
以下，介紹一下呢個課程。

先講第一大部分，【陽明學源起】。
宋代理學發展到明代，留低咗兩大懸而未決嘅難題，學術陷入僵局。我哋會用史家錢穆嘅《陽明學述要》總結出兩次內容。喺第一堂〔理學困境與心學醞釀：宋學所遺留的問題與明代學風簡介〕，我哋會用變化氣質同萬物一體掌握宋明學風嘅變化。
喺第二堂〔良知百死千難中得來：王陽明人生與其哲學大綱〕，就會見到王陽明憑住跌宕起伏嘅人生，從明代官場嘅濁流、刺客嘅刀鋒當中，提供新嘅哲學進路。我哋會睇下陽明點樣喺百死千難中體悟良知，明白點解熊十力面對馮友蘭話良知只是個假設嗰陣，要拍檯大罵。
所以，【陽明學源起】呢個部分實際上比較傳統，係用短時間了解陽明學嘅時代背景同思想大綱，約略知道良知、致良知、立意等等概念嘅意思。

去到第二大部分，【陽明學影響】，就比較有趣。
第三堂會係〔「我思」與「良知」：笛卡兒與王陽明，東西方啟蒙者的跨時空對話〕，我哋會使用鄭澤綿嘅《誠意關》，藉由「『知』的平等主義」嘅理論框架對比陽明同西方啟蒙哲人笛卡兒，發現東方嘅「良知」與西方嘅「理性」，竟然遙相呼應。人話講，就係陽明可以象徵住中國文化自發嘅啟蒙精神。
同西方對談，只停留一堂。第四、五堂都會使用張崑將嘅《德川日本儒學思想的特質：神道、徂徠學與陽明學》。第四堂係〔士人與武士文化之別：橘逾淮為枳，中日風土之別，如何孕育不同特色的陽明學？〕，陽明學東渡日本，我哋睇下點解喺「士大夫文化」同「武士文化」嘅土壤差異下，同一套學問會結出不同果實。
第五堂係〔亡國之學與革命志士：從清儒的空談誤國指責，到日本維新的精神動力〕，睇下陽明學點解一方面喺清朝被指「空談誤國」，去到日本明治維新卻變成「改革之光」。
整個課程就只係五堂，難度唔高，但我希望跨文化對話可以幫助你發現，良知亙古亙今，但佢嘅呈現總係「鳶飛魚躍」般活潑靈動。若然我哋可以多角度嘅檢視、立體建構對良知嘅理解，或者可以借古鑑今，了知良知嘅現代呈現——希望有機會同你睇下良知學點樣跨越地域，傳到西方、傳到日本，成為另一形態；從而思考一下，當佢跨越時間，傳到現代，形態會係點樣呢？

本集為會員podcast試聽。對應牛哥解經(18)
https://open.spotify.com/episode/5XFRUKOlrmGl4YrGZByOh5?si=YKWrXmamRPOCnkV3N526sQ
如有興趣，請加入會員支持！十分感謝！
－－－－－
喺上集，我哋通過牛頭人神話見到變形神話嘅兩種形態──失敗同成功。今集，將會係「夢與神話」系列嘅最後一集，我哋會用英雄嘅冒險之旅（成年式）所代表嘅公式作為理論嘅總結，呢一個公式包括三個部分：分離（隔離）X、傳授奧秘（啟蒙）Y、歸來（回歸）Z，我稱之為「xyz 圓圈」。
漫遊者出版社嘅《千面英雄》，喺封面寫到：「從神話心理學到好萊塢（荷里活）編劇王道」，所謂嘅王道，就係指好嘅劇本，都係會喺「xyz 圓圈」當中發揮。換言之，無論係美國隊長、iron man定係蝙蝠俠，佢哋嘅故事都係以「xyz 圓圈」嘅形式展現。
認識「xyz 圓圈」，除咗可以幫助你從故事、電影中閱讀更多，更能夠令你更投入到故事、電影當中，因為「xyz 圓圈」透露住神話嘅意義。
今集內容分成兩大部分：
「悲劇與喜劇」：我哋會睇睇作者（坎伯）係點睇悲劇與喜劇，以及悲劇與喜劇同神話嘅關係
「英雄與神」：我分出五個部分。
－「xyz圓圈」，詳細少少睇下「xyz圓圈」係咩意思；
－「佛陀與摩西」，用「xyz圓圈」睇下佛教同基督宗教嘅記述；
－「神話與內心」，睇下神話嘅現代意義
－「神話與神仙」，跟住坎伯一齊分出神話同神仙故事嘅分別
－「世界軸心」，作為《宇宙與歷史》嘅補充

傳說，西施會心痛。你有無諗過除咗天生心臟病之外，西施仲有咩可能心痛？

其實，呢種感覺，可能就係醫學上所謂嘅「心碎症候群」（broken-heart syndrome）。佢發作起上嚟同真正嘅心臟病冇乜分別，嚟得好急，但好彩去得亦快。
「心碎症候群」顯示住「心碎」唔係誇張嘅形容詞。科學研究指出，大腦面對「失去」嘅反應，同面對肉體上嘅痛楚係一模一樣嘅。有啲研究甚至表明，因為失去而引起嘅心痛，可以同斷骨嘅痛比擬。

而心碎嘅感覺，作者相當明白。我哋今次同樣以作者年輕時嘅親身經歷作為開始。當年得26歲嘅作者，曾經試過喺實驗室入面，痛到成個人縮喺地下。佢心入面勁驚，好肯定呢種劇痛唔止係驚恐突發咁簡單，甚至以為自己死得。當作者不停追問「我係咪要死」嘅時候，一個神經科學博士生好淡定咁答：「你唔會死嘅。」當時作者測量到自己嘅靜止心跳高達每分鐘110下，連同學都講笑話佢個心跳得快到就快著火。
一個健健康康嘅後生女，無啦啦點會搞成咁？原來，一切都源於極度強烈嘅壓力同「失去」。當時作者為咗讀大學，啱啱搬去一個新城市，點知男朋友喺佢到埗兩日之後，就狠心撇低咗佢。面對新學校、新環境、停學八年後重返校園嘅壓力，加上一段本身已經極唔健康嘅感情突然告終，佢個心終於宣告「罷工」。點解失戀或者失去一個人會咁痛？如果你理解神經可塑性第一定律，咁你應該大概知道答案。日積月累，你所愛嘅人已經深深烙印喺你大腦嘅神經元網絡入面。你放工會第一時間打畀佢，有好消息會第一時間同佢講，大腦神經元嘅發射模式已經習慣咗呢個次序。當呢個人突然消失，大腦嘅發射模式被迫打亂，大腦就會覺得極之吃力同痛苦。失去會推高壓力水平，令你陷入求生模式，甚至搞到你失眠，成晚眼光光不斷反芻過去。如果你明白呢種「終結」所帶嚟嘅痛苦，實在係you are not alone。因為「終結」對我哋每一個人都會造成傷害。作者發現，絕大多數人都為緊某啲嘢而暗自悲傷。有啲痛係令人無法接受（例如失去至親），有啲痛就源於失去最好嘅朋友，甚至乎，失去嘅可以係一個夢想——「悲傷也意謂著對你本應擁有的生活和未來感到悲傷。」。經歷過感情同生活嘅重創，作者開始回想人生中其他嘅「失去」，當中最深刻嘅，係考唔入醫學院嘅殘酷現實。自從爸爸喺佢十一歲過身，作者就應承過爸爸會學醫，學醫亦成為佢大半世人嘅目標。佢足足食咗十一次白果（大家下次心情低落，不妨諗下佢被拒絕過十一次，心理或者會平衡啲）。直至有一晚，經歷過種種「心碎」同痛楚嘅洗禮，攤喺床上面嘅作者突然開竅。佢審視內心深處，發現自己根本唔係真係咁想做醫生。呢個所謂嘅「夢想」，只不過係佢為咗兌現承諾，一直對自己重複講嘅故事；故事講得太多，連自己都呃埋。佢冷靜一諗：就算真係做咗醫生，最後咪又係會專攻精神病學或者神經學？講到尾，佢真正熱愛嘅，一直都係研究大腦。天下無不散之筵席，每一個「終結」往往都伴隨住痛苦。但正如作者嘅經歷話畀我哋知，當大腦捱過咗神經元重組嘅劇痛，嗰份痛楚反而會逼使我哋誠實面對自己，加以成長。最終，佢喺痛苦之中，搵到屬於自己真正嘅目標——令大家了解大腦運作方式，陪伴大家走出困境。因而，今集我哋繼續呢本《神經可塑性》，完成當中嘅階段1。今集內容包括以下部分：開始 00:00傷心的大腦 0:12:05失去與補償機制 0:28:38多巴胺與戒斷作用 0:29:44血清素與身體發炎 0:36:21催產素與時間 0:42:06內啡肽與內源性大麻素 0:55:21神經科學處理完結或失去 0:58:53舒適感 1:08:52逢星期三夜晚九點直播（如有字幕，字幕由ai生成，我無時間檢查，如有需要，自行取用）閱讀材料：《Rewire-神經可塑性：用神經科學突破行為模式迴圈，終結焦慮、恐慌和憂鬱，實現最佳的心理健康》🐮 Follow IG：https://www.instagram.com/cowgortalk🐂 加入讀物農莊，一齊閱讀，一齊討論！https://www.patreon.com/cowgortalk【文稿可於Patreon免費閱讀】成為頻道會員並獲得福利!【聽Podcast】🎧 Apple Podcast：https://podcasts.apple.com/podcast/id...🎧 Spotify：https://open.spotify.com/show/0yFR7YK...🎧 Google Podcast：https://bit.ly/3Cknf1m🎧 KKBOX：https://bit.ly/3RneS9t

預備新書過程中，回憶起《裸猿》呢本書，雖然當初錄音同書寫都未成熟，但我依然覺得呢本書好值得同我哋最近講嘅書——《槍炮、病菌與鋼鐵》以及《人類大歷史》一同閱讀。所以製作呢個合集，希望大家可以從動物學家（《裸猿》作者，德斯蒙德・莫利斯）、人類學家（《槍炮、病菌與鋼鐵》作者，賈德・戴蒙）、歷史學家（《人類大歷史》作者，哈拉瑞）嘅著作當中，回顧人類久遠嘅過去。
以下，係一個小小嘅簡介：
平日我哋照鏡，見到自己衣冠楚楚、手揸住杯咖啡趕返工，覺得自己人模人樣，可能會自覺自己係「萬物之靈」，擁有高度文明同理性，同大自然森林入面嗰啲「野獸」截然不同。
但係，如果今日有一位外星動物學家嚟到地球，完全唔理會我哋嘅哲學、藝術同科技，純粹用生物學嘅眼光嚟觀察我哋，佢會見到啲咩？——佢唔會見到高高在上嘅智人，佢只會見到一種行路姿勢古怪、手短腳長、幼兒發育極度緩慢，而且全身光脫脫無毛嘅奇特靈長類動物。好可能，佢會將我哋歸類為「裸猿」。
喺之前嘅內容，我哋講過老子嘅「自然狀態」、孔子嘅「人倫」，甚至荀子嘅「性惡論」，我哋可以見到哲學家眼中嘅「人」。但今次，我哋用最赤裸而客觀嘅動物學角度，去重新檢視「人」為何物。
今次要睇嘅，係英國動物學家德斯蒙德・莫利斯（Desmond Morris）嘅《裸猿》（The Naked Ape）。我哋會睇下本來喺森林舒舒服服食果實嘅祖先，點解要行一條九死一生嘅「演化歪路」，而人類社會嘅一夫一妻制、辦公室嘅權力遊戲，甚至係你平時忍唔住狂食零食嘅衝動，原來全部都係遠古時代遺留落嚟嘅動物本能……

本集內容對應：
S2EP3 智人點解咁特殊？動物學家研究猿人起源，發現咗演化上嘅關鍵分別｜《裸猿》（上）https://open.spotify.com/episode/4wcIS8kut1MOqBBHXZzbZO?si=RHPpLyUFSkCZ-CPHxOQE3Q
S2EP4 人類點解咁少毛？裸體係爲乜？從動物學角度分析人類性行爲｜《裸猿》（下）https://open.spotify.com/episode/0QXhwmriqMPT341BqtlAUJ?si=BpigsnmVQg6o2IxuiShRBA
以及半集會員podcast
【石屎森林嘅裸猿】演化心理學家：人類天生貪食、多夫多妻？遠古人類活得比現代勞工仲舒適？丨生活雜談EP45丨《人類大歷史》（5）丨哈拉瑞史觀5.1https://open.spotify.com/episode/3gKmVVa3B8RZI5eU4MEasy?si=ocIHoApxSCW1vLxuOrZrCw